盧頌之（DaDa）上月涉嫌酒駕被補，DaDa事發當晚借了dbc數碼電台主持陳達仁細佬架車，但就發生咗撞車意外，坐喺後座嘅乘客陳達仁，不幸右手臂骨裂，今個月頭入院做手術。事件發生咗之後，DaDa潛水避傳媒，過咗半個多月沉澱反省，今日佢就接受《蘋果》獨家專訪，仲去到黃大仙廟拜神祈福。

今日1點左右，DaDa就買咗燒肉、燒豬手、蘋果同香燭到咗黃大仙廟拜神祈福，同時又求籤，DaDa下跪祈福，又親自上香，全程一腳踢，並求到十七號籤「蕭河月下追賢」，籤文「秋水蒹葭白露凝，盈庭月色浸階清，清風吹動馬鈴響，響接晨鐘不斷聲」，解籤嘅時候，相士就話係中吉籤，相士指蕭何月下追賢漢代一個挽留人才的故事，蕭何輔助劉邦建立帝業，名將韓信投靠劉邦未獲重用，蕭何獲悉便策馬追韓信。

相士問清楚DaDa想問官非，相士指DaDa乃韓信，正等待蕭何這貴人出現，所以犯上官非一定要搵一個適合律師協助解決疑難，事件先可以迎刃而解。DaDa聽咗之後安心，佢事後更將拜神燒肉同蘋果，贈予港鐵站邊嘅婆婆行善。

車禍意外令DaDa上咗寶貴一課，佢話：「我一定唔會再犯，件事唔係累到自己，一個唔小心會累到別人，係嚴重錯失。」

DaDa今日帶燒豬手往拜神，為陳達仁祈福，佢就否認揶揄對方：「大家唔好誤會，我想佢早日康服，豬手係保佑陳生，希望佢隻手快啲康復．呢件事係我過失，令佢受傷，豬手又可佢橫財就手，我都帶咗蘋果嚟拜黃大仙，希望大家都平平安安。」DaDa又話現階段冇聯絡陳達仁。