日本女星齊藤由貴曾經係80年代當紅偶像，不過由全盛時期到年過半百都魔性不變，已有搞人夫前科嘅齊藤由貴，最近被爆有老公都搭上已婚醫生近七年，經上月開記者會否認不倫，近日卻被公開啜姦夫密照，令齊藤由貴形象再一次破產。

後日係齊藤由貴嘅51歲生日，由佢代言嘅手機廣告合約肯定凍過水，而另一個都係由佢代言嘅美容產品都保唔住，產品官網噚日已剷走有關齊藤由貴嘅廣告網頁，相信佢同事務所要賠至少幾百萬港元嘅違約金。

噚晚，齊藤由貴到電台開咪做直播節目，佢冇正面談及婚外情風波，但甫開咪就話：「過住食龍肉都冇味嘅每一天。」佢自言到電台前相約來自美國嘅朋友食貴價意大利菜，雖然知道眼前嘅絕對係美食，可惜自己完全感受唔到，仲於節目內嘆氣。齊藤由貴昨晚現身，吸引傳媒到電台守候，對在場記者提問佢未有回頭，由工作人員陪同直入直播室，當做完節目後，齊藤由貴於凌晨1時後，由多名工作人員護駕下登車離去。