今日王祖藍同李亞男結婚，郭晉安夫婦喺台上讀經，郭晉安受訪表示:「近兩年同祖藍合作《老表》，祖藍覺得我哋對佢有一定了解，佢又想搵圈中基督徒夫婦，佢搵我冇諗點解，佢叫我咪做。」

問朝早接新娘係咪玩到好激？佢話:「係要着t-back食榴連，做好難嘅動作。過五關斬六將先接到新娘，第一次咁接新娘，第一次做兄弟團。」會否教祖藍夫妻之道？安仔話:「唔使教嘞，佢係一個咁認真嘅男人，做乜都咁認真，一個對感情咁認真嘅人，一定有自己相處方法。」

做姊妹嘅朱璇未入教堂已爆喊，問佢係好激動？佢話:「係呀，好感動，見到Leanne拖Daddy企喺禮堂門口已忍唔到，我哋幾個姊妹都係，真係好祝福佢哋。」好恨結婚？佢話:「嗰一刻好戥佢開心，佢哋感情終於都結果。」有冇搶花球？佢話冇:「我咁高大，我出去搶對其他女仔唔公平，自己都希望花球掂到自己。」

講到咁消極唔掂喎，唔通多人追都唔恨？朱璇話:「唔係，我陣間返屋企，多謝Leanne今日結婚等自己有嘢做，唔係我就好慘嘞。」講到玩兄弟遊戲，佢話:「遊戲比想像中好好多，姊妹都好善良。」咁滿唔滿意開門利是？佢話:「自己唔知幾多，呢啲睇心意啫。」

孫耀威就喺台上同女友唱詩歌，講到亞男致詞時講錯佢同陳美詩做夫婦，老孫話:「其實無所謂，喺教會感覺真係好浪漫，如果可以嘅話，都想喺教會度搞，參考祖藍婚禮，希望佢哋白頭到老。自己喊濕兩張紙巾，女友都有喊。」問到幾時結婚？佢話:「到時一定邀請大家，有諗，但未有具體計劃及實際行動。」喺呢兩年？佢表示:「應該都會。」