當年今日
關於我們

【原本想低調處理】認識兩年唔算閃婚 陳展鵬話隨時準備好造人

蘋果日報 2018/09/10 19:11

結婚陳展鵬單文柔

41歲陳展鵬今日宣佈迎娶28歲女友單文柔(Phoebe)。陳展鵬今日接受傳媒訪問,被問到幾時決定結婚時,陳展鵬話:「其實心裡邊計劃咗好耐㗎喇,可能我自己性格問題啦,可以承諾或者timing啱嘅時候我先講出嚟,所以都有一段時間㗎喺心裡面。」
至於講到求咗婚未?展鵬話:「我求咗㗎喇,求婚係喺香港求嘅,其實去英國影相有個原因喺度,嗰啲由番Phoebe自己講啦,睇佢想唔想講啦,留番一個好嘅回憶,呢行有時拍戲,你見到有啲畫面好靚咁跪喺度求婚,佢成日覺得我唔夠膽喺街做呢啲動作,咁就差呢樣嘢先應承我囉。英國係佢好鍾意嘅地方,同埋佢讀書嘅地方,所以喺英國做呢個畫面出嚟,係希望佢留住呢刻回憶。」
展鵬話啲衫同好多嘢都係現成喺英國再買,包括佢套西裝:「希望再有多啲唔同嘅嘢囉,橫掂過咗去,Phoebe又鍾意,多啲唔同嘅嘢盡量去影多啲,所以我同你講好刺激,影個婚紗相好開心,一來可以同大家分享,二來好刺激咁有時畀人見到會偷影,偷影咗擺上網上邊就已經穿咗,所以成個過程好刺激。」
展鵬話其實唔想太高調做呢件事,本身佢係諗住去外國一個酒莊之類地方搞婚禮:「因為要配合雙方家長,我自己屋企人唔係好方便搭飛機,所以決定喺外國影一輯相,都要明白香港媒體大家都係想同我分享呢件事,所以都希望影啲相發畀大家,同大家公佈,當然我自己想盡量private去做呢件事啦,但亦都冇可能。」
被問到算唔算閃婚,展鵬話:「唔算啦,其實我哋都識咗接近兩年,不過都需要大家磨合,同埋睇睇大家性格適唔適合。結婚除咗係兩個人嘅事,都要雙方嘅家長見個面,傾個偈各方面覺得ok,所以我哋個planning其實已經安排好晒點樣去做。」
問到幾時行禮擺酒,展鵬話:「10月中,我都盡量想低調去處理件事,我哋所有儀式都會做足,但可能食飯嗰度雙方面家長、老人家食餐飯就算啦,所以未必請好多朋友擺好多圍嘅酒,簡單啲。如果一做大就要好多嘢,同埋要就大家工作時間,本身兩方面家長都想低調處理,希望private啲,配合埋雙方老人家。」
問幾時生BB計劃,佢話:「隨時ready㗎!呢啲係講緣份同埋個天安排嘅,最緊要我哋搞掂嚟緊呢個婚禮。」
精選娛聞,喺晒《娛果》
http://fb.com/appledailyent