恒指服務公司季度檢討唔聲唔聲嚇你一驚，以前踢走過波鞋股裕元（551），突然又情迷高跟鞋，百麗國際（1880）成功踩入藍籌之列。當然公司自2007年5月上市以來，受惠規模經營及垂直整合，食正大眾消費內需概念，加上百貨公司專賣點議價能力提升，自有品牌佔收入比重上升至54%。
去年同店銷售增長18%當中，5%來自提價，通通都係最合乎分析員胃口嘅餐單，加上去年賣咗擁有Fila嘅附屬畀安踏體育（2020）又袋3億，支持毛利進一步提升。

成本增下半年業績反映

然而勞工成本自7月起上升15%，皮革原料成本亦上升15至20%，兩個成本因素作用雖有所滯後，仍將會在下半年業績中反映，投資者要關注公司產品還有多少提價空間以抵銷成本上升之影響。
集團09年每股盈利30.04分人民幣，較08年23.82分上升26%，09年派息比率卻只有24.96%（7.50分），較2008年倒退，假設2010年中期及末期息一如往年般每次漸進式加多0.5分人仔，即係今年最少要8.50分人民幣，折番做港幣9.77港仙。
其中一個上市前已持股之股東EssenWorldwide於2009年12月18日以每股9.20元減持舊股，好倉持股由8.18%減至7.33%，相當於7107.5萬股，家從13蚊望番轉頭好似覺得佢好蠢，不過股價於2月初亦曾跌過落去8蚊邊，你精人家亦未必笨，佢始終未沽晒。不如幫昨日晨咁早高位13.8元入市嗰班人諗諗點甩身仲好啦，惟有希望滙豐證券嘅統計指出過去成功晉身藍籌嘅股份於入成份股7日前入市，平均取得5.45%回報機會率達87%係有「10個真」啦，否則兄弟姊妹們刮損腳就真係「10個趣」喇。
胡孟青
獨立股評人