中國廣電總局噚日公佈整治改革情況，提到遏制天價片酬同明星炫富問題，據知今次廣電總局會打壓電視劇及真人騷以「天價」搶紅星接拍嘅現象，唔會再亂發批文，出手打擊紅星片酬過高嘅問題。

資深製作人徐小明嘅製作公司現時主力喺大陸拍劇，今日接受《蘋果》電話訪問，表示支持廣電總局以行政手法調節演員片酬，認為大陸電影電視圈嘅現象好唔健康，上億元製作嘅大片，有六、七成嘅錢被兩、三個一線演員吸走，而非一線嘅演員基本上係冇加過價，其他演員都抱怨過，拍攝時都冇咁投入，認為大部分利益都去晒一線演員身上。

徐小明都覺得廣電總局出招調節，相信大陸電影電視圈就片酬一事已去到失控地步，官方先會出手。徐小明又指，大陸藝人片酬已高於於日、歐、美、韓等地嘅演員薪酬。以美國、韓國為例，演員片酬一般僅佔製作費用嘅10%到30%，相反中國一線藝人片酬閒閒地佔製作費70%。

佢指出日、歐、美、韓等地係有健全嘅方法或方案去保護電影製作，演員片酬唔會佔製作費咁高，佢認為應該趁早解決呢個問題，以免破壞中國影視圈發展。