港股前日急升之勢未能持續，但相比隔晚美股與昨日日股，已經算係叻仔，恒指由跌96點到埋單只係負8點。
中行C輪9684：中行（3988）昨日算係風平浪靜，收3.50元，報低1格咁大把。但隻明年3月到期嘅C輪9684則高台跳水，由前市嘅54仙碌到16.9仙，大瀉69%，成為是日死火輪王，有近1球易手發生乜事？
隻輪前日首天登場，前日有2.4球易手，高低價54仙/53仙，相差1格。昨日一開就係17仙，前日就算買到最低，都已經做咗大大隻嘅鷓鴣──俾人㩒嗰隻。
隻輪錯就錯在前日高低價54仙/53仙，發行價25仙，竟然有人夠膽嘜高1倍有多，又竟然有成交；前日溢價37%，槓桿率6.5倍，咁嘅數據，點捱得住？到咗昨日急跌後，溢價縮番到27.4%，槓桿率20.7倍（有效6.4倍），似番啲樣，但仍然偏貴。有啲窩輪，亂嚟，咪做鷓鴣。

中海油C輪2251：中海油（883）係第3威嘅恒指股，收6.50元，升2.4%。昨日推介嘅C輪4998收87仙，升10%。呢隻係大成交中海油C輪之選，升幅比唔上槓桿率大嘅同類輪。
升幅最大嘅係4617，收5.7仙，比前市急彈1.1倍。下月8日屆滿，下月2日最後買賣，剩番6日交易。假如到咗結算之時，正股平均價同𠵱家一樣，則隻輪只值3仙，即係輪價要跌1半。4998係炒上炒落正路之選，2251亦係唔錯對象。
章盛