有神仙外號之稱的蔡約翰現時於練馬師榜帶到離行離列，早前憑「平海福星」勝出打吡大賽之後就靜咗一陣，有兩個賽馬日無馬贏，令到唔少人猜測究竟係咪放慢步伐，唔使贏得太盡？

但話口未完，神仙蔡就喺啱啱禮拜三夜馬（28日）贏番匹半冷門「勇闖者」，馬匹配上莫雷拉仍有7.7倍都算好分，而且此駒仲係自本月7日「歡喜心」之後，騎練攜手合作再次取得頭馬。

贏番匹「勇闖者」後，似乎蔡廐攻勢未有放緩跡象，今次復活節賽期（4月2日）出報6駒，其中由雷神執韁之3匹「友瑩囍」、「精算閃擊」及「魅力知友」相信梗係焦點所在。有一項利好數據，就係蔡約翰已連續九季復活節賽日有馬贏，今年要延續優良傳統，看來機會絕對不弱。