駱胤鳴同張彥博今日去到新城為合作嘅新歌 《有種愛情》做宣傳，駱胤鳴話歌名有兩個意思，其中一個就係一個係好有勇氣去追求愛情，佢話自己都係一個好勇於追求愛情嘅人：「不過我每次主動親嘅男仔都冇好結果，好彩o依家呢個係佢追我。」

張彥博就話：「都係第一次合作，成首歌都係佢寫俾男朋友，我要好努力咁代入角色，睇到啲歌詞都畀佢哋閃親。」問到駱胤鳴點解唔索性搵男朋友合唱？佢話：「唔好喇！佢怕醜呀，不過彥博同我男朋友一樣，都係屬於好Charming嘅暖男 。」

兩人今次嘅新歌MV已經拍完，仲有床戲㖭，駱胤鳴話：「不過係大家着住睡衣，瞓喺張床上面擺Pose，可能因為太攰太多嘢做，我哋兩個都分別影下相嘅時候瞓着咗。」