港產喪屍片《今晚打喪屍》下星期將會上映，由萬梓良、張繼聰同白只主演，電影改編自本地作家余兒嘅同名小說，之前佢套作品《九龍城寨》部份角色都被無綫套《城寨英雄》參考過。

早前余兒喺荃灣寫字樓接受訪問，講到點解會寫喪屍故仔，呢個題材對港產片嚟講非常少，佢話：「香港某一部份人其實都幾似喪屍，未必會有一個追求思想自由嘅意志。」

好似有啲政治，不過本小說同電影個古仔都好本土，余兒話：「《今晚打喪屍》小說暫時推出兩部，分別係《浴血富山邨》同《旺角大血拚》，兩個位喺平行時空嘅獨立故事，中間又有些少連貫。」佢仲話寫旺角係因為細個住過嗰區。「

余兒係做漫畫編劇出身，最後投身小說界，佢話因為個腦成日轉諗咗好多古仔，加上好想寫一個完全屬於自己嘅古仔，所以就開始寫小說。至於萬梓良嘅出現，余兒話係一個驚喜，因為兩部小說都有提及過萬子，估唔到真係搵到佢演電影版，余兒話：「小說裏面有個女仔，佢嘅偶像就係萬梓良。第二集有個人嘅造型，或者個樣係跟萬梓良嚟度嘅。同電影公司傾嘅時候，問我邊個角色係特別想去搵，我淨係諗到萬子哥呢個角色。」而古仔去到第三集，余兒都射咗啲社會人物或者現像入去，有少少喻意。

另外，《今晚打喪屍》除咗拍成電影，稍後仲會有漫畫版，由漫畫家葉偉青主理。佢話識畫畫其中一個好處，就係易啲識女仔：「讀書時試過同一位女仔成日坐同一架巴士，試過畫咗幅畫畀佢，大家就咁識咗。」

採訪：馮國康、何永寧、Sapna
攝錄：馮峰、Neo