韓國MBC電視台早前被爆有內部黑名單，各員工因政治立場而被劃分等級，待遇亦會有所不同，令一眾員工大感憤怒而決定大罷工。據知KBS電視台工會亦不滿KBS高層剝削新聞自由、無視員工意見，故響應MBC工會，齊齊喺今日凌晨開始進行總罷工，兩台工會均表示，罷工會持續至電視台高層集體辭職。

據知KBS及MBC今晨起，已分別有1800名員工及2000名員工參與罷工，有指工會方面將於韓國時間晏晝2點喺MBC廣場、KBS辦公大樓正式展開總罷工，為清算言論積弊及履行改革投入抗爭。

隨住罷工開始，KBS及MBC多個節目受影響，KBS嘅新聞縮減20至30分鐘不等；而MBC情況更嚴重，繼《無限挑戰》及《我獨自生活》、《蒙面歌王》等大型節目落實本周起無限期停播後，原定今日播出嘅節目《哥哥的想法》、日日劇《歸來的福丹芝》亦宣佈停播。另外，原定今日錄影嘅MBC中秋特備節目《偶像運動會》，最終決定取消，預計節目將會停播。