【想爆肌】學老婆鄭秀文勤做運動? 許志安︰係愛呀!
許志安鄭秀文做運動爆肌
許志安今日喺商台宣傳新歌《教我這麼愛下去》,佢覺得呢首可以成為結婚進行曲,新郎可以透過呢首歌,話畀新娘知點樣為對方改變。問佢有冇為老婆鄭秀文改變啲乜?安仔話:「冇乜特別,唔係唱畀佢聽。」
安仔透露最近keep住做運動,「唔係為開騷,我想有改變,想大隻爆肌,我開始咗一個月,會一直keep住做,到出年農曆年就暴食兩個月增肌,到時滑水都唔使着救生衣,你估着救生衣係求生嘅咩,係遮住肚腩咋,我食雞胸食到成個雞胸咁嘅樣。」問到有咩驅使佢做運動?佢笑住話:「係愛呀,其實因為生活得太舒服,我想挑戰下自己,同埋做運動對身體好,點解唔做下,除咗滑水,我仲會學彈結他、打鼓,增值自己。」由於現場貼有余迪偉嘅半裸宣傳海報,安仔即刻話:「余迪偉係我目標。」
精選娛聞,喺晒《娛果》
http://fb.com/appledailyent