德國最近幾日又熱到飛起，中午溫度達到攝氏35度，球迷其中一個消暑方法係飲啤酒降溫，但喺英格蘭對厄瓜多爾大戰前夕，有百幾名英格蘭躉醉酒鬧事，最後被德國警方捉晒，兼罰佢哋坐監冇得睇波，你話幾唔抵呢。
英格蘭對厄瓜多爾喺史特加舉行，不過有線直擊隊噚日就去咗法蘭克福河畔大電視進行直播。法蘭克福河畔同史特加現場比較，球迷氣氛無咁瘋狂，但由於法蘭克福當地出名多英格蘭球迷進駐，現場嘅氣氛都唔算差好遠。

悶熱女球迷派冰淇淋

近日天氣非常悶熱，男球迷睇波惟有赤膞上陣，至於女球迷亦唔輸蝕，着晒比堅尼到場睇波，順便享受埋日光浴，真係一舉兩得。球迷就話可以坐定定睇比賽啫，但一班球員要喺球場跑足90分鐘，體力透支好厲害，仲好易中暑，難怪英格蘭領隊艾歷臣都建議球員打完波後用冰降一降溫。可能個天終於肯體諒一班球員同球迷，德國噚日好多地方終於都落大雨。呢一場雨就令各地嘅氣溫急降至22至23度左右，希望可以淋醒一班覺得天氣熱而搞事嘅球迷啦。
講番英格蘭對厄瓜多爾場波，雖然只係靠碧咸嘅一個靚罰球一箭定江山小勝1:0，不過贏幾多都冇關係。今次英格蘭擁躉能夠開心通宵慶祝，真係要多謝碧咸百步穿楊嘅罰球。之前艾歷臣仲話想唔用呢位隊長，睇怕𠵱家佢都要轉口風先得啦。
有線06世界盃嘉年華，將於今晚9:00pm——11:00pm，播出世盃外景隊採訪滙報