吳千語同男友林峯向來有影皆雙，表現得糖黐豆，不過由於林峯嚟緊要開工，千語BB只好搵其他好姊妹解悶。

噚晚千語BB約咗何超盈﹑同超盈傳斷背緋聞嘅林建岳女兒林愛兒等，一行五個女仔去咗谷祖琳開嗰間「小甜谷」嘆甜品，五個女生密密斟﹗

千語BB﹑超盈及愛兒等人，揀咗坐喺舖頭門外座位，見佢哋點咗唔少甜品，仲買埋隔離舖嘅分子雪糕，幾個女仔齊齊嘆，分甘同味但又唔怕肥。

雖然男友不在身旁，但千語BB胃口都算唔錯，見佢不時大啖甜品放入口；唔知係咪門口多人經過，超盈同愛兒只係打對面坐，表現甚為避忌。

食完傾完約半粒鐘後，愛兒就先行埋單，五人一同離開，身穿短裙嘅千語BB晒長腿，惹嚟唔少目光，之後佢同超盈坐愛兒座駕離開，千語BB好識做主動坐後排座位，司機位隔離就留番畀超盈坐。