出演韓國選秀節目《PRODUCE 101》男團版而出道嘅限定男團Wanna One，下月3及4號首度襲港喺亞博館開騷，Wanna One現時人氣爆燈，特別係《PRODUCE 101》中得冠軍嘅姜丹尼爾，佢早前成為韓國雜誌《In Style》10月號嘅封面人物，仲要係雜誌於2003年創刊以來首次搵男星登封面，足證佢人氣有幾勁。

而雜誌方面就公開姜丹尼爾嘅相片，並透露當日拍攝時姜丹尼爾喺現場相當專業，令工作人員都讚不絕口，由於當日嘅拍攝主題為「姜丹尼爾嘅50種臉」，所以姜丹尼爾就要喺鏡頭前展示唔同魅力，有性感、有撒嬌等等，因為佢表演得好放，所以現場人士都唔相信佢只係得兩次拍攝封面嘅經驗。

雖然因為Wanna One活動而忙過不停，姜丹尼爾受訪時亦直言感受到大家嘅愛，亦謙虛話唔覺自己配得上有咁嘅待遇。而佢又提到早前錄影《Happy Together3》時，見到平時節目主持人坐喺身邊，覺得好神奇同有意思，又自爆一直用好奇嘅表情望住「國民MC」劉在錫。

另外，喺噚日公開嘅調查中，姜丹尼爾就成為9月份男團成員個人品牌評價嘅冠軍，其隊友朴志訓及黃旼泫就分別得第二及第三名。