近排公司注資同埋賣殼嘅新聞,似乎日日都喺身邊朋友之間響個不停,主要相信都係國內同胞都想盡快將自己嘅公司喺香港上市,希望可以食正就快推出「北水南調」嘅政策。伏勝聽個做企業財務嘅朋友講,今次批國內同胞大多數都係靠國內地產發迹嘅,加埋佢哋喺國內有唔少地產項目,順理成章會搵番隻地產股嚟借殼上市。
個朋友重同伏勝講,呢班大陸客非常之麻煩,睇咗好幾隻都話唔係好啱,唔係話隻殼太細,就係話隻殼「唔多乾淨」,不過因為佢哋非常之叠水,所以做企業財務嘅人通常都會拿住幾隻殼股畀個客揀。單單呢一排傳緊有機會成為殼股嘅公司,就已經有一大叠,其中更包括隻愈潛愈有嘅金朝陽集團(878)。
金朝陽呢隻股仔上星期五收4仙9,市值得番1.53億,啱啱合正班大陸客嘅口味,聽講已經有人喺度搭緊線,希望可以將佢哋拉埋傾偈。大家不妨留意一下呢隻股仔,或者可以搭一程順風車都唔定。