聖誕過完,重有三個禮拜多啲就過年。中國人過年係大件事,有好多親朋戚友嚟拜年,點忙都要掃吓屋,以免失禮人,如果裝修就一定要過年前竣工,煲呔亦唔例外,二十九號之前佢一定會搬入禮賓府。
九七回歸之後,有人話上亞厘畢道呢間殖民地督轅大宅風水唔好,俾中銀大廈一把刀咁劈到正。又有人話呢度係英國殖民主子高高在上奴役中國人嘅地方,為咗去殖民化,唔可以住。於是有人建議攞嚟做博物館,有人建議用嚟擺壽酒,甚至有人話要改埋名叫紫廬……總之意見一大籮,董先生唔知點好,惟有租多個嘉慧園單位,幾大都唔搬。
眨吓眼七年過去,禮賓府日日丟空,杜鵑花開又好謝又好冇人理。卒之等到董生腳痛收工,煲呔黃袍加身,話之你乜嘢風水,草地照鏟魚池照起,一於同啲錦鯉一齊搬番落山。
咁煲呔會幾時搬呢?二十九號係年初一,之前有三個禮拜六日,一定係其中一日。八方四圍打聽,有高人話唔係十三號,因為嗰日係黑色星期五,所以係十四號。