廣南集團（1203）跌到落近半年低位，預期PE得單位數，又係時候兜一轉。廣南09年度（12月底止）純利升咗80%到1.8億元。雖然，純利包括政府補貼收益，但講緊只係3760萬元。所以，就算撇除呢項收益，廣南純利仍然有唔錯增長。
隨住經濟復蘇，集團主打馬口鐵業務增長，今年應該更快速。好保守計數，就當廣南本年度透過核心業務增長，去彌補政府補貼收益減少，純利仍然keep係1.8億元，預期PE都係得7倍幾。再講，家陣祖國人均罐頭消費量，每年都係得1公斤，相對發達國家50至90公斤，仲差好遠。罐頭以至到馬口鐵嘅中線發展空間，可以好爆炸。呢轉吼實半年橫行底1.36元兜一轉，上望橫行頂1.80元，波幅回報率32%，廣南PE仲未到雙位數。

折讓大鱷魚恤抵買

鱷魚恤（122）最新每股NAV1.22元，現價0.52元折讓57%，應該係市場裏面，折讓最大嘅成衣股之一。又對上星期五，同類股金利來集團（533）忽然升咗8%，至於廸生創建（113），就細火煎魚，升足成個星期，又逼近1年高位。資金追捧成衣股，鱷魚恤可以炒落後。呢轉短打，博鱷魚恤升20%到0.63元，目標價嘅折讓，仲挨近50%，仍然好殘。
錢雋