一張凳，一本簿，一支筆，一男子五年多前以此「三寶」，擊倒手拿一瓶酒、一隻杯的另一個男子；現在，梁振英說得最多的是「一帶一路」，那張凳、那本簿、那支筆，原來只是道具，見識過梁振英手段的工聯會陳婉嫻受訪時說：「係！佢誤導咗我哋，呢個字最準！」　

記者：呂浩然

「（五年前）喺荃灣一個商場，（梁振英）當時講貧窮、就職困難、低薪，我係講者、佢係講者，當時佢仲未係特首，（台）下有個阿姐問佢：『你哋啲老闆知唔知我哋幾慘？』，佢話：『得，我記住，我幫你手』，呢個印象好深刻。另外一次就係（見）深水埗同啲老人家、新移民，用一種好開放（態度），嗰時開始講一張櫈仔、一支筆、一本簿，嗰時開始嘅，印象好好嘅」。

「當時唯一一個（論壇），佢同唐唐一齊講房屋，佢好明顯有準備、有powerpoint，唐唐就揈吓揈吓就嚟……跟住去黃大仙講就業需要、活化工廈等，佢好叻，佢唔係坐私家車嚟，坐地鐵嚟，一落嚟見到老人家就痞低同啲老人傾計，個picture好靚，唐唐（唐英年）反而冇呢啲嘢」

「你可以咁講嘅，或者我哋（五年前）太過見到一啲pro我哋諗嘢嘅香港特首候選人，我哋自然咁樣傾向去嗰度……如果你問我，我又唔覺得係一個好呃，但客觀上佢（梁）就用呢啲手段，令到我哋呢班人好全力支持佢」

「你知最初喺某啲地方、特別建制嗰邊傳出：係唐唐㗎嘛（新特首），咁所以我都曾經被好多人問過我，係咪真係支持梁振英？我話係呀……我諗佢（梁）成功囉，肯定唔係選咗先做（形象工程），之前已經做咗，好早做，變咗我哋呢班人、或者我呢啲畀人叫做『保梁局』主席就有原因，我諗你問我今日呢，係！佢誤導咗我哋，呢個字最準！」

「（梁上任後）發表第1份施政報告嘅時候，我發言都屬於正面嘅，即係佢喺扶貧嗰度做到……第2份開始冇（希望）喇，（咁快？）梗係啦，你知嗎？（問題）唔係早一、兩年就可以處理㗎嘛，因為我哋知道標準工時係一個好複雜嘅嘢嚟㗎嘛，唔係你話要做就做。」

「（梁）太過計算，而佢偏偏冇將基層嗰種反對聲音計算……管治者要睇番各種唔同嘅力量，首先唔好將某啲唔同意嘅力量，你打到佢歸邊……管治係難嘅，階段矛盾存在係難嘅、要處理，但唔等於冇辦法」

「可能佢喺某個部份（市民）好受歡迎，咁佢受歡迎就完全跟嗰個軌跡去行，咁佢睇唔到另一部份人喎，嗰部份人唔好話去到好大比例，就算兩成、三成，都要處理呢個矛盾，我成日話管治最緊要令到各個唔同嘅階層，大家都能夠分享到你政策上嘅一啲事項……就算我唔同意你，起碼你喺一啲地方攞番中軌，我諗呢點佢，呢幾年我覺得係冇。」

《蘋果》請受訪者回答三條問題，送別梁振英：

一）梁振英有乜優點？

「勤力。佢針對某件事呢，佢就幾勇吓，不過你要睇埋佢做咩先得……佢係好勤力嘅人，但就真係個方向，要記住自己係個特首嚟，（應）企番中間、嘗試吓去解決矛盾。」

二）如果100分為滿分，梁振英有幾多分？

「我唔想畀分，我近呢幾年唔鍾意畀分……我覺得喺分數上我好難去畀到分，因為如果你問我Donald（曾蔭權）呢，我畀到分喎，佢有件事我睇到嘛，你問董（建華）生，我畀到分。」

三）對梁振英有何臨別贈言？

「好似畀佢（都）冇乜意思喎，可能都唔啋你喎……（沉默40秒）佢要放下身段，團結一齊可以團結嘅人。」