由反對D&G唔俾港人喺門口影相、親自去埋示威，又派生果力撐碼頭工人，之前更疑似暗示考慮從政，仲呼籲大家「切勿支持私煙」，靚抽到呢……佔領期間，夏蕙B都有落過旺角同市民打氣，真係成個「正義女神」咁，人人爭住嗌佢做BB。

噚日正義女神又出動喇，今次佢做嘅行動，其實大家平時都好大機會遇到，但處理手法呢，就要小心，要冷靜。

話說噚日夏蕙B坐東鐵，期間遇到一婦人個拖住個大到塞得落一個成年人咁大嘅行李篋，婦人個篋撞到車上一位小朋友，夏蕙B見狀就好心提佢小心啲，點知該名婦人竟然話番夏蕙B轉頭:「明星惡晒呀！」當時夏蕙B經理人都喺度，馬上影低。

睇番張相，見到呢位發惡鬧夏蕙B嘅婦人——個篋，真係好鬼巨型，佢仲要坐喺車門附近，個巨篋就擺正佢大髀前面，好似路障一樣。一河之隔——即係通道另一邊車門附近，同樣坐咗，大髀前面放住兩件巨型行李嘅婦人。

多麼令人懷念年初一二三！你一定懂的。唔少網民都鬧爆巨篋婦，夏蕙B見狀，即做「和事佬」謂:「作死咩！咁多人鬧佢，你哋乖乖地唔好再鬧同怪佢啦！其實我細個都喺廣州讀書同生活，只係好運啲早咗嚟香港，開頭都唔習慣香港環境，要慢慢嚟，幫下佢哋，教下佢哋，等佢哋習慣下啦！不過隻死肥豬已經用鬧我啲語氣怒瞪著個位女仕，佢講完個句『明星惡晒』都已經收咗口啦。我真係想大家開開心心，和平生活。」