【連環有新歌】王馨平想開中型演唱會 自薦博到盡好抵用
蘋果日報 2019/09/19 16:53
王馨平心有千千結
攝影：盧妹
王馨平今日到商台宣傳新歌《心有千千結》：「因為星娛樂做咗隻翻唱碟，所有歌都改編過，我哋每人唱一首，仲有祥仔（阮兆祥）、Chilam（張智霖）、小恩子（黎瑞恩）同Sukie（石詠莉）。我首歌都有少少優勢，因為本身係合唱歌，而家變咗單唱，感覺已經好唔同。」
問到唱片公司會否開群星騷？王馨平直言從未放低歌手的身份，亦希望可以開騷：「自己都有keep住造歌，不過上一首新歌已經2年前，其實我都造緊一首全新嘅歌想同大家分享，但係我就冇乜時間表嘅，總之唔使再等2年啦。」
至於可有意舉行個人音樂會？王馨平很希望舉行個人音樂會：「中型場啦，唔好太細，不過如果要做音樂會，就要做好多前期，例如造番多啲新歌先。」她表示忙於教瑜伽，因此需要團隊協助。是否有意簽唱片公司？她說：「我未真正諗過，不過我哋唔使簽約都竭盡所能，我都幾抵用呀，我覺得自己好過啲簽咗約嘅歌手。」
平日忙於教瑜伽，她笑言終於令老公願意嘗試瑜伽，成為她的「入室弟子」，王馨平說：「佢之前唔肯做架，不過我都係同佢做啲靜態動作，都係舒緩都市人問題，佢自己都覺得做完呼吸都暢順啲。」
採訪：盧妹
王馨平有新個人單曲，亦正籌備新歌，希望之後夠歌開演唱會。
不過同時要忙住教瑜伽，最近成功勸到老公嘗試一些靜態動作。