【新增內容】
經典日劇《縮水情人》女星高橋由美子，日前被爆搶人老公，高橋由美子更被雜誌《週刊文春》拍得同人夫到酒店開房，記者更追訪男方搭住高橋由美子膊頭在雨中撐傘拍拖一刻，高橋由美子當時仲死撐大家冇拍拖：「搭膊頭唔代表拍拖。」佢強調大家只係相約飲酒嘅朋友關係。由於婚外情越鬧越大，高橋由美子之後透過事務所公開道歉，文中表示自己有欠理性，承認今次輕率應受到讉責，曾與高橋由美子合作嘅男星藥丸裕英都在直播節目上嘆道：「後生時我哋合作過舞台劇相處一個月，有咁大變化令我好吃驚，完全唔同晒，以前佢係個率直可愛女生。」

其實44歲嘅高橋由美子以前真係人見人愛，佢當年於90年代吃香歌視界，貴為人氣偶像演出《縮水情人》及《最高的戀人》等偶像劇，當中95年播出嘅《最高的戀人》，高橋由美子就同稻垣吾郎擔任男女主角，二人仲係堀越高校同學，更被外界視為金童玉女，雖然當時雙方對大家都抱有好感，但兩人都係冇發展成情侶，原因係高橋由美子當年17歲已搭上一名比自己大十多年嘅有婦之夫，佢曾受訪時表示自己係個「戀父狂」，而稻垣吾郎之後就同菅野美穗發展多年地下情，高橋由美子幾年前在SMAP節目上承認的確曾經冧過稻垣。

不過最令人意外嘅係，高橋由美子原來曾經戀上菅野美穗現任老公堺雅人，而且多年曾已係圈中公認一對，可惜高橋由美子沉迷杯中物，菅野美穗卻介入，並成功爭贏堺雅人更宣佈閃婚，如今已組織三人幸福家庭，反觀高橋由美子卻浮浮沉沉，目前更做小三令形象直插谷底。

精選娛聞，喺晒《娛果》
http://fb.com/appledailyent