當年今日
關於我們

黃秋生唔選會長陳芷菁歎:上一次係我嘅劫嚟嘅

蘋果日報 2014/02/07 06:00


今日年初八,機場依舊人來人往,之前同黃秋生就競選演藝人協會會長鬧得滿城風雨嘅陳芷菁,今日亦現身機場。

黃秋生已經話到明唔會再選,話到明:「唔搞喇!我怕是非,呢啲無謂嘅是非。」又話自己嘅內閣早已解散。至於志偉有否挽留?當時秋生話:「佢冇搵我,亦冇挽留我。我寫咗封信俾佢,解釋咗件事係點樣,我真係無能為力,話埋俾佢知內閣解散咗。」

選舉下周五就舉行,一時傳肥媽會加入爭做會長,咁依家究竟件事發展成點?啱啱由沙巴KK島返港嘅秘書長芷菁話:「呀係呀…不過我諗你哋問阿志偉會係最好嘅,始終佢係上屆會長,我諗有啲嘢佢會安排。」咁芷菁有何心水?佢哈哈笑話:「我嘅心水?我想劉德華做囉。哈哈。」那可有同志偉提過?佢就話:「其實我哋大家都有講0架喇。你知其實劉德華係一個好有責任心嘅人,如果佢做呢個位,應該係安排咗好多佢自己嘅工作先,咁呢個係我自己心目中想嘅啫。」至於會否自薦,佢就好決絕咁話:「唔會。」

芷菁話:「要做會長,一定要好德高望重,同埋受兩岸三地認同,我呢啲後輩只可以喺後面幫手。」又話知仲有咩候選人,最重要係先選咗理事會先。至於是否鬆一口氣?芷菁就話唔會:「唔會囉,其實我相信,我覺得上一次係我嘅劫嚟嘅,咁我個人係鍾意秋生嘅,我亦都覺得秋生係有能力做到嘅。知道佢決定退選,我都覺得好可惜。」