韓國人氣男團Wanna One早前推出新碟《0+1=1 (I Promise You)》回歸樂壇，更打算於直播節目《Star Live》宣傳造勢，但11位成員卻唔知手持嘅鏡頭早已開咗直播，喺後台狂吐苦水，暗示公司收賣人命，大呻冇自由同休息，又指收入只分到20%，事件喺韓國引起爭議，同時引起Wanna One粉絲對Wanna One所屬嘅YMC事務所不滿。

而今日就有報道指，Wanna One去年6月至12月進行活動嘅銷售額達到逾200億韓圜(約1.45億港元)，扣除製作專輯、拍MV、服裝、化妝等工作人員嘅費用後，Wanna One獲得逾130億韓圜(約9,438萬億港元)嘅純收入。

報道引述相關人士透露，Wanna One成員近日獲得去年活動所分到嘅收入：「據Wanna One嘅合約內容，組合活動收入由CJ E&M娛樂抽取25%、YMC事務所抽取25%，餘下嘅50%由成員與各自所屬事務所嘅比例再進行分配。雖然各事務所及成員所定嘅分配率可能會有差異，但如果以五五分帳嘅話，大概每位成員有3億韓圜(約217萬港元)嘅收入。」該人士續指，Wanna One成員個人活動嘅收益，會再另外清算。

對於Wanna One各成員首次收入清算可獲3億韓圜嘅報道，其所屬嘅YMC事務所就表示：「報道內容我哋無法準確做出判斷，因各家經紀公司嘅分配比例唔同，同時又有部分成員有單人活動嘅收益，所以每個成員都會有啲唔同，所以我哋亦唔清楚準確嘅結算金額。」

更多韓流，喺晒《娛果》
http://fb.com/appledailyent