35歲金像影后妮坦莉寶雯（Natalie Portman）憑《第一夫人：積琪蓮．甘迺迪》（Jackie）將會於本月27日舉行嘅奧斯卡再爭影后殊榮，佢之前拍下嘅作品《Planetarium》推出新劇照，貴為影后嘅佢唔介意作全裸演出，可見佢喺沙灘背面全裸曬太陽，大騷fit晒身材，被人淋水時仲笑得好開心。
呢部電影由妮坦莉及尊尼狄普（Johnny Depp）17歲寶貝女Lily-Rose Depp合作，年齡差距18歲嘅佢哋演姊妹。

故事設定於30年代巴黎，妮坦莉同Lily-Rose呢對來自美國嘅姊妹有通靈能力，喺觀眾前表演時被一名法國導演睇中，想搵佢哋拍戲展示特別才能。導演嘅出現亦繼而令姊妹因妒忌反目成仇。