黃金周已經唔係炒作題材，但東方表行（398）一樣要昅住，皆因有ChinaPlay呢個爆炸性元素。集團07年度（3月底止）純利增長45%到9487萬銀，嚟自祖國及澳門嘅溢利，就倍升到3726萬銀。雖則話06年度嚟自地區嘅溢利基數唔係大，但過往幾年，東方表行嚟自祖國嘅溢利，一路穩步向上，加上家陣祖國股市一支箭，多咗好多bigspender，對集團非常有利。再講，集團嚟自祖國純利基礎仲細，中國業務一進入軌道，整體純利自然嘭嘭聲咁上。
好保守計數，東方表行08年度純利增長，只係維持07年度水位，純利上1.3億銀，PE都係6字頭。買佢ChinaPlay概念，股價有調整，吼住2.5元撈底，以08年度預期8倍做目標，潛在升幅近30%。

新海上望1字頭

新海能源（342）啱啱公佈07年半年度（6月底止）業績，相當靚仔，純利增長56%到2690萬銀。呢家液化氣一條龍企業，到今年上半年，旗下珠海碼頭已經躍升為祖國第三大液化氣碼頭，加埋集團又獲得Glencore及Vitol等國際知名液化氣貿易商，提供長期供貨合同，規模效益已經贏晒。新海07年度保持上半年純利增幅，應該唔難，全年度純利6600萬銀，PE都係5倍幾。新海上望1字頭，PE都係7.4倍單位數，但潛在升幅有30%。
錢雋