當年今日
關於我們

董建華謝票茶會富豪動氣
賭王斥楊受成:不要拖我落水

蘋果日報 2002/03/13 00:00


【本報訊】對於三富豪何鴻燊、鄭裕彤及楊受成前日在酒店早餐密斟事件,賭王何鴻燊昨日炮轟英皇集團主席楊受成「拖佢落水」感到極度不滿,他又劃清界線澄清無約楊「早餐會議」擺平地產神童羅兆輝的言論風波,他暗示楊受成是不請自來,楊受成則指是鄭裕彤安排。另方面,羅兆輝今日在報章刊登啟事,為他近期「編造」故事對受到傷害的人士公開道歉。 記者:羅綺萍、馮美茵、顏英儀、朱芷瑩
何鴻燊昨午參加董建華的謝票茶會時公開澄清,前日早上根本沒有約會楊受成到君悅酒店食早餐,並形容對方恍如「搭枱」。

澄清沒有一齊坐
他直斥楊想「拖佢落水」:「我同彤叔(鄭裕彤)昨(前)日朝早係傾過嚟,但冇同楊生(楊受成)傾過一分鐘,我去到見佢(楊)坐喺處同彤叔傾偈,佢一見到我即刻起身話『你兩位傾啦,我走嘞』,我冇同佢一齊坐。」
何鴻燊續稱:「我同彤叔傾到咁上下,佢就走番嚟坐低話:『我留低咗個信封喎』,呢個唔係事實,啲夥計都話冇喎,楊生你冇信封喎。咁佢就行咗去,可能佢坐喺處就搵人嚟影相。」

一句無講羅兆輝
至於他與彤叔談話內容,他說:「我哋傾生意唔使同你哋(記者)講,總之我一句都冇同佢(楊)講過嘢,亦一句都冇講過羅兆輝。」
說到這裏賭王顯得異常動氣:「我講得清清楚楚,只係見過一面,冇生意來往,亦未同佢(羅兆輝)去過街或者食過嘢,故此冇用嘅,唔好拉埋(我)一齊講,拉唔到我落水嘅。」對於會否介入「擺平」這次羅兆輝風波,他斷然地說:「我絕對唔會牽涉呢件事。」
但有周刊影射他兩位女兒吸食可卡因,何鴻燊更加氣憤,滿臉通紅地說:「我都好唔高興,所以我今(昨)日打電話畀楊生(楊受成)叫佢唔好拉我哋落水,今次都拉唔到落水!」
亦有出席謝票茶會的鄭裕彤對於「早餐會」事件表現極不耐煩,他說:「我成日都有同佢(楊受成)食早餐,昨(前)日冇傾羅兆輝。」但沒有解釋為何前日同時相約楊與何二人。
楊受成指鄭相約
對於羅兆輝大爆富豪風流史,彤叔稱:「都唔關我事,又唔係講我,我冇嬲佢(羅兆輝),因為又唔係話緊我。」
而被賭王斥責的楊受成昨日表示:「當日唔係何生約我,係鄭生約咗我,之後又約咗何生。」至於何鴻燊直斥楊不要拉他落水,楊受成就辯稱:「我打電話畀何生,佢(何生)話係叫你哋(傳媒)唔好將羅兆輝單嘢拖埋佢落水,我諗你哋誤會咗佢嘅意思啦!」
作為澳門旅遊娛樂有限公司的股東之一的鄭裕彤,昨日回應傳媒提問,表示無意出售旗下的百分之十八的股權,並強調和何鴻燊是好朋友。
而澳娛大股東何鴻燊則坦言:「和彤叔好一致,係好拍檔」。對於十姑娘何婉琪要售百分之七點三的股權一說,他則表示自己擁有百分之五十一的股權,「使乜擔心」。