當年今日
關於我們

球員見證愛女出世缺席比賽
教練力撐:生命中最重要是甚麼

蘋果日報 2017/05/26 00:00


事業定家庭重要?唔少打工仔都要面對呢個兩難,但對於職業運動員嚟講,鐵漢柔情唔係容易被允許流露嘅一面,除非你遇到好似立陶宛聯賽球隊薩基里斯(Zalgiris)教練、41歲前立陶宛籃球名將積斯基域斯(Sarunas Jasikevicius)咁樣一個好上司。話說喺上周五立陶宛籃球聯賽季後賽4強Game 3,薩基里斯中鋒奧古斯圖利馬(Augusto Lima)因為迎接囡囡Alba出世而缺陣,雖然球隊最終依然贏波,但有年輕記者賽後問及點解睇利馬離隊,積斯基域斯就好似教仔咁教訓嗰位記者:「我點樣睇?係我畀佢離隊。你有冇小孩?當你有小孩,年輕人,你就會明白。因為呢個係人生經驗之中最崇高嘅一種。」

積斯基域斯其後仲反問記者:「你認為籃球係生命中最重要嘅事情?(唔係,但4強的確重要。)對邊個重要?(球隊。)邊隊?(薩基里斯。)你見唔見到在場有幾多fans?重要?當你見到第一個小孩出生,你就會明白咩叫人生最重要嘅事。因為世上冇任何事物比小孩出生更美好,唔係錦標,唔係任何事物。利馬目前猶如置身天堂,我為佢感到高興。」對於教練肺腑之言,利馬亦表示:「我嘅妻子流下淚來並感謝佢,我亦傳咗短訊畀佢:『你守護我嘅家庭,我亦會守護你嘅。』」結果利馬亦喺Game 4歸隊,貢獻2分、8籃板,幫球隊晉級總決賽!

↓積斯基域斯肺腑之言↓
http://bit.ly/2q7JoZ4