【李八方online】做咗特首辦主任 陳國基遭家人放棄
李八方ONLINE楊立門陳國基
陳國基(右)接受楊立門(左)訪問,其間露兩手彈結他。
已離開政府嘅「AO歌王」楊立門今日喺網台節目同訪問特首辦主任陳國基,陳國基喺訪問中透露,自從做咗呢份大內總管嘅工作後,唔單止冇再去長途旅行,亦唔可以講定想邊日放假去旅行,因為佢隨時會因為公事唔能夠起行,所以當佢屋企人計劃旅行時,已經唔會再預佢一份。
喺節目上,陳國基仲露兩手,表演彈結他。陳國基話喺求學階段,已經去青年中心教邊緣青年彈結他,等班年輕人從事吓啲正常活動、消耗吓啲精力。陳國基話,學樂器有助減壓,但楊立門叫佢公開表演,陳國基就話唔會:「影響政府形象嘅嘢,我唔做喇。」
盛傳楊立門同林鄭月娥啱Key,楊立門喺訪問中問陳國基被林鄭羅致嘅經過。佢憶述,林鄭當選後邀請佢出任特首辦主任,自己無考慮之下即時應承:「我第一時間應承咗,因為我覺得林太係一個好有能力嘅人。」八方最想知,楊立門當下嘅內心,究竟諗緊乜嘢呢?
立會補選新聞,《蘋果》一網睇晒
http://bit.ly/appledaily1125