昨日國壽（2628）臨近11時突然停牌，大市上演過一幕九霄驚魂。但睇番即市圖，港股高開無耐即掉頭急跌，似乎一早有人預知有利淡消息出現，剛好國壽停牌時大市順勢跌至全日低點，跟住就由低位反彈，稍後國壽澄清停牌涉及廣東發展銀行股權交易，並非配股，更非掌舵人被請飲「中國咖啡」，大市重拾升勢，恒指最後升61點收市，H股指數更升72點。
由國壽停牌事件反映大市開始古靈精怪，而大市愈升愈高時，投資者並非盲目睇好，仍抱有一定戒心，反映香港股民較前成熟。若按以往經驗，散戶未瘋狂，大市應未散住。
聽大行老友話，近排大市急升，部份買盤來自早前睇錯市的基金，由於年結將近，無法不追貨交差，因為除非大市短期大散，否則無貨一定跑輸大市，追貨尚存希望大市續升，可以交到差。散戶有精有笨，基金何嘗不是？

基金增持恒地

前日買入的恒地（012），早市曾高見44.40元，升逾2%，可惜跟隨大市回落後，未能重返高位，最後只升0.40元，收43.90元。聯交所資料顯示，ThirdAvenueManagement於周一增持恒地5001萬股，每股作價43.025元，最新持股量7.01%。四叔昨日異常風騷，話買股票好過做地產，仲話佢手上股票隻隻賺錢，閒閒哋升一個、半個開。趙飛雲則希望恒地短期股價升番一兩成，潤飾一下投資組合的成績。
趙飛雲