沈震軒、吳海昕（Sofiee）、王宗堯與電影公司老闆蕭定一等，噚晚喺銅鑼灣出席《hmvod劇力SUMMER 2018開播派對》，宣傳原創劇《暗算天機》，蕭若元仲帶埋孫仔一齊上台，好熱鬧。

沈震軒透露最近忙於返大陸拍電影同電視劇，講到早前佢喺社交網站自爆作三首歌只收$7,500酬勞，問主題曲係咪都由佢所作？佢話：「今次唔係我作，但會同Sofiee合唱，佢第一次畀咗我，佢唱歌幾sweet，我仲搵佢幫我下首歌《不枉》做MV女主角，係講熱血追愛。」作曲搵唔到錢？「唔係，試多啲唔同嘅嘢，同唔同演員、團隊合作都好開心。」

而喺《不枉》嘅MV中，Sofiee會演一個同現實嘅佢完全不同嘅角色：「我現實係懵懵哋嘅，個角色係護士，會着制服。（制服誘惑？）沈震軒話係老人院嚟，所以唔使。」沈震軒透露今次劇集係第一季劇情，第二季或會以電影作延續，笑言感情會再有發展，佢仲向導演請纓參與電影主題曲創作。

另外，《樹大招風》道具領班因藏有道具銀紙被定罪，(相關新聞﹕ https://bit.ly/2xztH5f )，王宗堯好無奈咁話﹕「香港電影都幾委屈，道具假又嫌，CG差又畀人話，可能唔鍾意道具太真，真過沙中線啲接駁位啩，我諗該有上訴空間。」覺唔覺得政府一邊支持，另一邊打壓？佢話﹕「唔搞好好啦，所有地方政府都會支持當地電影，香港係中國一部份，香港電影都應該有認受性，應該要撐。」

精選娛聞，喺晒《娛果》 http://fb.com/appledailyent