估唔到發展局局長陳謬波除咗鍾意個個星期「頻謬Blog」之外，連如廁次數都一樣多！八方發現，謬波上周六出席一活動後，五分鐘之內先後去咗兩次廁所，然後先走近傳媒發言，惹嚟唔少在場人士猜測，係咪慣咗匿埋寫blog少見人，鍵盤男出番嚟現實世界就好頭痕，要喺廁所冷靜咗先識回應人？
話說謬波周六喺中央圖書館演講廳出席一公開活動後，大批傳媒喺廳外守候，想問佢續任張震遠時究竟知唔知對方有財務問題；謬波離開演講廳後，一度朝記者咪兜方向前進，但最終佢係走入附近嘅廁所。

回應傳媒戰戰兢兢

當時在場傳媒都不以為意，但佢幾秒鐘後迅速出返嚟，似乎唔係有如廁需要。當大家估佢真係會行去咪兜時，佢竟然企喺廁所門外同官員傾偈，傾完仲行返入去演講廳派卡片，似乎唔係好想理等緊佢嘅傳媒咁。
好嘞，派完卡片，應該扑咪嘞啩，點知走出演講廳，謬波竟然再度折返廁所，同佢對上一次入去，只係相隔五分鐘左右咋，呢次佢十幾秒後又出番嚟。到底入去仲乜？點解去得咁頻密，但每次時間又咁快嘅？八方真係無從稽考，唔通謬波連如廁都要響應梁振英所倡議嘅「香港速度」，唔要好似東涌發展咁龜速？但觀乎佢之後回應傳媒時戰戰兢兢，唔少人相信謬波可能係騰雞到要入廁所冷靜吓。眾所周知佢只係鍵盤戰士，網誌撰文兇人就叻啫，現實世界講多句嘢，有時都口窒窒，何況係要回應梁班子大量醜聞？
mailto:[email protected]