超強颱風山竹來襲，今個周末睇嚟要宅在家，練習吓瑜珈高難度動作，準備好迎接下個周末喺假中環海濱舉行嘅健康生活節。

為期兩天嘅健康盛事將提供超過80堂瑜珈及健身班，仲搵嚟星級瑜珈導師坐陣，包Pure Yoga導師鍾麗淇、國際瑜伽錦標賽冠軍得主魏秋琪等等。

唔少保險公司都爭住贊助呢類健康活動，一嚟夠健康，二嚟又可以提升公司形象，宏利香港今年第二次做主贊助商，公司上下仲好支持，首席客戶總監劉錦珠已經預告會落場，同大家打吓氣，一齊輕鬆吓！

最大得著當然係配合到公司嘅保險產品，做埋宣傳啦！好似ManulifeMOVE app咪標榜可以記錄步數，拎保費折扣嘅，不過華華心諗，玩瑜珈企定定架喎，睇嚟公司要諗吓計仔，等呢批潛在客仔都可以爭取多啲折扣！