52歲嘅江華喺鏡頭前消失咗近十年，轉做保險嘅佢，狀態依然好Fit，聽講呢輪有內地同香港製作公司搵佢出山拍戲，佢就話審慎考慮緊。

之不過佢未復出，已經有唱片公司敲佢門，但唔係簽佢做歌星，係睇中佢個女至真。原來有唱片公司收到風，知佢個女天天秉承咗老婆麥潔文（Kitman）嘅唱歌天份，所以主動提出同佢個女簽約出唱片。

今日本報打畀佢老婆麥潔文（Kitman），佢承認確實有唱片公司傾緊同佢個女簽約，而Kitman話：「我同老公商量過，如果天天自己想入樂壇，我哋會支持佢，因為佢的確有歌唱天份，佢讀完高中之後，就想加入歌壇發展，我就叫佢好好苦練下歌藝，到一切準備好先至入行未遲，佢0依家每日跟我學唱歌，平均練5、6個小時，好鬼勤力，既然佢咁鍾意唱歌，我就覺得應該俾佢試一下，之不過我有提醒佢，做歌星壓力好大，唔係一般人可以承受，叫佢要有心理準備。」

Kitman指個性樂觀開朗嘅女兒天天，今年已經有20歲，5呎7吋高，叫Kitman放低媽咪身份，以導師資格評論下個女歌藝，佢話：「天天係有做歌星天份，目前唱得係唔錯，好有自己風格，跟我嘅風格完全唔同，不過目前嚟講，唱歌技巧仲需要磨練下，等經驗多咗，應該會有更大進步空間。」