【6點半體場●一周人語】大敗無阻追逐籃球夢 香港真光廖心頌：最想打精英賽
蘋果日報 2019/12/27 18:30
D1精英賽一周人語6點半體場香港真光廖心頌
港島學界D1籃球女子組A Grade四強塵埃落定，香港真光中學雖然大敗予衛冕的漢華中學，但主將廖心頌獨力撐起半邊天，表現毫不失禮，即使無緣決賽，但小妮子冀珍惜惟一一年A Grade機會，轉戰季軍戰於籃球聖地修頓擊退對手，率隊重返闊別四屆的精英賽。
港島女子組漢華和英華雙雄割據，兩軍連續五年會師A Grade決賽，不過昔日勁旅真光近年重現光芒，去年先奪B Grade亞軍，今年再於A Grade躋身四強，惜面對漢華力有不逮，以20:87敗陣，然而就讀中六的廖心頌獨取16分，雖敗不辱。由於廖心頌提早入學，故她最後一年在學始首征A Grade，碰巧時局不穩，賽事多次延期，她感言過去幾月心情忐忑，「一開始聽到延期都好唔開心，都最後一年，有諗會唔會就咁白費咗，所以重開都好開心，既然有返機會就要珍惜佢。」真光自14-15學年起多年無緣三甲，今年廖心頌領軍入四強卻遭遇大敗，她明言盡力已無憾，「一路打都知有實力差距，而且練波時間、體能都不及對手，攰又比人更易放棄，但人哋都有付出，無得賴，自己得到嘅都係自己。」縱然緣盡決賽，但真光明年1月13日將亮相修頓室內場，對決港大同學會書院爭季軍，如取勝即奪精英賽入場券，廖心頌願望此役能交出表現，以圓精英賽夢，「一路都想入一次修頓，唔係睇人打而係自己打，我好想剷到上籃入靚波。都最後一年喇，以前都見過師姐打精英賽，一路夢想好似佢地咁，如果成功入到真係對我好大嘅鼓勵。」
記者、攝影：洪量丰
昔日勁旅香港真光（黑衫）近年重現光芒，去年先奪B Grade亞軍，今年再於A Grade躋身四強。（洪量丰攝）
真光雖然大敗予衛冕的漢華中學，但主將廖心頌（左）獨力撐起半邊天。
廖心頌（中）冀珍惜惟一一年A Grade機會，轉戰季軍戰於籃球聖地修頓擊退對手，率隊重返闊別四屆的精英賽。
廖心頌（右）指：「一路都想入一次修頓，唔係睇人打而係自己打，我好想剷到上籃入靚波。」