容祖兒同李克勤下月喺紅館舉行嘅演唱會，再度加場後已經火速售罄，克勤及祖兒聞言感到十分開心。

克勤表示：「今早收到一些歌迷朋友仔留言，話自己已經係通宵排，開售時明明係前幾名，但排到佢哋都買唔到最貴嘅飛，只係買到四百八十。我真係覺得唔好意思，咁香港咁多個網票網，可能其他售票網排嘅人手快，我哋已經盡力每人只可以買四張飛，希望多些朋友買到。另外，我好希望大家唔好去買黃牛飛，咁冇人買，啲黃牛炒唔到，最終原價放番出來，大家先好買（不過我可能諗得太天真，哈）。」

容祖兒就話：「啲飛真係好似我條腸，好似我身體個消化系統一樣咁健康，一陣就咩都消化晒，冇晒。我真係覺得好開心，咁為咗答謝咁多人支持我哋的朋友，我哋係會努力做好準備，做好個騷佢。為報答觀眾，我決定熱烈提議李克勤用蒙面歌王白稄鏡形象係紅館見大家！哈哈！希望李克勤唔好打我。」

李克勤聞言即笑稱：「傻啦，我如果蒙面，你不如着番套足球或者羽毛球衫，用番『報告教練』個形象出來？」