除夕至元旦，又係紅日假期，如果有「小鮮肉」表演陪住過節，係咪好吸引先？來自傳統體操強國烏克蘭嘅四人男子體操雜技天團「Space Elements」，本周六起(12月30日)至元旦日首度來港獻技，一連三日應邀喺新城市廣場呈獻【力．疊雲霄】。

呢隊平均年齡只有18歲嘅人氣男子雜技天團，都係技巧體操名將，近年喺多個國際賽中攞獎，擅於揉合力量、平衡同舞蹈而創作出獨特體操雜技，來港獻技當然唔可以欺場，據知屆時會挑戰人體支點平衡極限，除夕晚倒數派上演出驚心動魄嘅「人力飛天鐘擺」，以沖天氣勢陪住大家倒數踏入新一年。

團隊骨幹成員Vladyslav A今日聯同三位團員率先抵埗喺新城市廣場預演，期間以疊羅漢形式搭出五米高嘅人體金字塔，當中一位成員更喺塔尖頂以單手做出360度迴旋式倒立，旋即再喺塔尖上以柔軟肢體化成時針鐘擺，喺空中來回擺盪，非常驚險，挑戰觀眾心跳指數。