【拉麵變杯麵仲廣告植入】離晒譜!大陸版《深夜食堂》變深夜靈堂 有徐嬌都難救
大陸徐嬌黃磊深夜食堂翻拍
國產版共40集嘅《深夜食堂》周一(12日)喺大陸首播,呢套劇改編自同名漫畫同日劇,主打sell美食同人情味。
日本版無論收視同口碑都好,大陸照辦煮碗,再加埋電視一哥黃磊,同動員唔少中港台紅星好以趙又廷、徐嬌、任賢齊、恬妞、蕭敬騰、楊謹華等,諗住實食冇黐牙,結果第一集就已經俾網民狂轟,鬧爆套劇充斥植入式嘅生硬廣告、兼演員演技浮誇眼神空洞。
難怪北京衛視同淅江衛視首播嗰集,收視會奇低,排名更分別只得第9同第13。至於第二集,就講述由鄉下出城嘅徐嬌,帶住一個夢想,幾經艱辛終於成為偶像歌手,但呢集收視再跌,想翻身都真係有啲難度。
除咗植入式廣告同演員唔喺狀態,究竟國產版嘅《深》仲衰啲乜?之唔係,成個場景以至演員對白都抄足日本,但日本版《深》演員食嘅係拉麵,國產嘅食「泡麵」(即食杯麵),仲要有泡麵牌子、酸菜甚至地產公司海報嘅大特寫鏡頭,真係見到有胃口至奇。
-居酒屋食泡麵?!
-直頭侮辱原作同日本文化。
-應該要加插食客食完嘢唔比錢,聚眾拎武器打傷店主同破壞間鋪先!
-中國版深夜食堂為什麼就成了深夜靈堂?
-應該係整地溝油同黑心嘢食。