當年今日
關於我們

【C1頭條】「水行俠」積遜為仔女接拍 安芭呻遭暴力拍檔整蠱

蘋果日報 2018/12/20 00:00

安芭赫德温子仁水行俠積遜莫瑪

DC大作《水行俠》(Aquaman)嚟緊就會上映,一班演員男主角積遜莫瑪(Jason Momoa)、女主角安芭赫德(Amber Heard)及導演溫子仁(James Wan)早前就飛到菲律賓馬尼拉出席記者會及紅地毯活動,佢哋仲接受本報獨家專訪。兩位主角首度合作即有好成績,原來拍攝時亦火花四濺,積遜就話:「其實都主要係我整蠱佢,我唔覺得佢有整蠱我。我做埋啲低能嘢,煩住佢,因為佢成日掛住睇書,所以我一直不斷煩住佢,又整古做怪,又嘈住佢,仲撕爛佢本書,只似不斷做低能嘅事。」安芭亦補充指:「佢就好似個大細路,佢唔可以被忽視,佢接受唔到。我喺拍攝時就相反,我好靜,我係個書蟲,只會對住自己,我覺得咁可以保留精力,所以我只會打開本書。但Jason就會收埋我本書,或者偷咗我本書,甚至撕走最後一頁,搞到我一定要同佢講嘢。」完全體現積遜「野人」本色。
出名錫老婆仔女嘅積遜,又自爆原來當初接拍此英雄片都全因為一對仔女:「我個女好鍾意神奇女俠,我個仔就鍾意蝙蝠俠,可以同自己嘅仔女一齊拍攝好開心。於佢哋呢個年紀,佢哋又好鍾意我做緊嘅嘢,作為爸爸,可以有呢個機會真係好正。」點知積遜越拍就越投入,感性嘅佢仲有幾場於拍攝時喊咗出嚟:「我拍攝時有喊,有一場我見到我媽媽,同一場我同(怪物)Kraken講嘢嘅時候,都幾牽動情緒。」今次二人同影后妮歌潔曼(Nicole Kidman)有大量對手戲,安芭更指自己都忍唔住偷師:「睇佢演戲簡直係感受緊自然力量咁,睇佢嘅藝術表演,好特別又永遠有驚喜,你會忍唔住要跟佢學嘢。」
精選娛聞,喺晒《娛果》
http://fb.com/appledailyent
empty
empty
「水行俠」積遜接受蘋果獨家專訪,笑言係為仔女接拍電影。
empty
安芭就大呻遭暴力拍檔積遜整蠱。
empty
積遜一向狂野,於首映上表演Haka舞蹈被網絡瘋轉。
empty
二人於戲中飾演情侶。
empty
安芭指濕身拍戲相當辛苦。