每年一度嘅電訊盈科(008)股東大會,識睇一定要睇電盈忠實股東兼「電盈小股東大聯盟」代表陳仲翔「大戰」李澤楷(Richard)。
不過,可能電盈大搞免費電視ViuTV,造福人群,當中《跟住矛盾去旅行》亦頗受歡迎,陳仲翔今年冇寸Richard,只係借題發揮,問Richard會唔會粉墨登場,拍攝下一輯節目,為ViuTV收視做貢獻。
而Richard噚日睇落心情幾靚,講嘢都特別風趣,指陳仲翔今年嘅提問,係「最唔挖苦我嘅一年」,又笑指暫時未收到《跟住矛盾去旅行》製作人員嘅邀請,「唔知會唔會有一日製作同事,會邀請你同我一齊去旅行,呢樣我可能會考慮。」會場隨即哄堂大笑。
開完股東會後,Richard亦罕有走到台下去同陳仲翔握手,簡直係世紀握手呀。佢亦有同投訴會場太細嘅小股東傾偈,Richard仲話,明年會考慮搵個大場,等更多人可以入去直接向佢提問。