【爆相爆片】深水埗逾20人毆鬥
劉小姐:一星期嘈3晚

蘋果日報 2018/04/26 00:00


【本報訊】深水埗早幾日上演街頭亂戰,差啲以為佢哋拍緊戲!話說星期一(23日)晚11點幾,住喺黃金商場附近嘅讀者劉小姐,聽到樓下嘈暄巴閉,即刻望吓咩事,原來有成廿幾個南亞大漢追逐混戰。

根據劉小姐提供嘅片段,幾名大漢橫過馬路,爬過分隔長沙灣道南北行線嘅花圃,跑過對面街,一見目標就拳打腳踢,仲擸起竹枝做武器,結果廿幾人夜媽媽喺條街你追我逐,遇襲嘅人喺毫無準備之下,節節敗退,當然走為上著,最終兩批人都向黃金商場方向走咗去。

劉小姐話,其實嗰頭嘅治安不嬲都唔太好,經常有一批印巴南亞人士聚集,平均一星期嘈3鑊,通常係凌晨1至2點發生,曾經見過有人拎石頭擲向店舖鐵閘,間唔中仲發生圍毆打架事件,都真係好擾民。

警方就話,當晚11時半,有市民報警話福華街99號福昌樓外面,有6至8人互毆,但阿Sir去到,所有人已經走晒喇。