花旗國小圈子選舉
夏日求驗客:當奴雲砌低朗拿度

蘋果日報 2002/07/12 08:00


𠵱家全世界最出色嘅足球員係邊個?朗拿度?非也;李華度?錯喇;簡尼?唔係;碧咸?都唔係。咁到底係邊個咁猛料可以掃低晒呢班全球最知名嘅超級巨星?此人就係今屆世界盃美國隊英雄當奴雲喇!
今年啱啱二十出頭嘅當奴雲,喺噚日由美國體育巨擘ESPN主辦嘅ESPY頒獎禮上,竟然壓倒晒「哨牙度」同「萬人迷」等一班超級球星,當選為今年最佳男性足球員。我求大俠雖然知道花旗國嘅球迷同傳媒對英式足球嘅知識匱乏,但係一個喺今屆世界盃上大放異彩,帶領巴西五度稱霸世界球壇嘅朗拿度,竟然唔及得一個「初試啼聲」嘅當奴雲,真係好難令球迷信服。
我求大俠相信如果將呢個以美國傳媒投票為主嘅小圈子選舉,擴大至全球各大體育傳媒都可以參與的話,得獎者肯定另有其人。

紅魔網頁「外星」人擔正
曼聯官方網頁manutd.com,喺今個夏天有個好特別嘅舉動,就係將卡洛斯、李奧費迪南、杜林等球星放喺首頁做「知客」,當正佢哋自己人咁款,唔怪得咁多關於佢哋加盟曼聯嘅吹水新聞啦。不過喺官方網嘅首頁,想搵個曼聯球員嘅樣睇吓都冇,好似有啲喧賓奪主喎,唔知曼聯又有冇向卡洛斯佢哋畀番肖像版權費呢?

查柏東尼信得過?
意大利教練查柏東尼口口聲聲話,國家隊大門仍然會為剛轉會去咗英超聯米杜士堡嘅前鋒馬卡朗尼打開,間接否認出國搵食嘅意大利球員無機會入選國家隊嘅講法。但係睇番之前嘅例子,除咗韋利
盧比斯轟巴迪高要道歉
盧比斯日前接受電視訪問時,出言炮轟阿根廷同袍巴迪斯圖達。話晒巴迪斯圖達都係前輩,為國家隊亦貢獻良多,盧比斯咁樣惡意抨擊對方就唔係好啱嘞,好在佢後來都有公開向「巴迪高」道歉,我求大俠都希望佢補到飛。

列基美唔好咁快開心住
巴塞隆拿終於簽咗阿根廷球星列基美,不過列基美睇嚟都未必可以咁快開心住,因為巴塞隆拿會長加斯柏講到明下季將佢借出(𠵱家好似同烏甸尼斯斟緊)。咪列基美重以為可以完成踢巴塞隆拿嘅美夢,到頭來都係唔成事,我求大俠都戥佢可憐。

簡拿華路獅子開大口
AC米蘭對「大簡」簡拿華路有興趣,「大簡」就話都有可能加盟,不過就一定要有比起佢𠵱家喺帕爾馬嘅人工高,咁至有偈傾。人望高處,「大簡」咁諗都好正路嘅,不過𠵱家市道唔好,佢咁樣獅子開大口法,轉唔轉到會就真係要睇佢造化囉。