【李八方online】文匯go go go 葛博士話「香港共產黨」搞亂社會要取締
香港共產黨武力起義港獨
「香港共產黨」fb專頁指,該黨成立後,將現行反革命人士引蛇出洞,為習總書記立奇功。
港府將「香港民族黨」冚旗,曾創辦「香港民進黨」嘅楊繼昌,即高調以「香港共產黨」名義,聲稱想請民族黨召集人陳浩天為「總書記」,唔少人食晒花生,等睇政府如何落手取締「港共」,果然《文匯報》馬上go go go,周四報道指多個政界人士異口同聲,認為政府要做嘢。
報道指既然「香港共產黨」表明會「積極嘗試建立武裝,不排除武力起義」,政府應依法追究,訪問咗民建聯立法會議員葛珮帆,指楊繼昌等人明顯唔尊重「一國兩制」,存心挑釁中央,為「港獨」分子張目,撩事鬥非、搞亂社會,總之就係無好嘢,促政府正視並取締有關組織。
工聯會立法會議員陸頌雄形容有關人等係「政治小丑」,只係為撐「港獨」垂死掙扎,如果將來政府真係出手,「香港共產黨」被取締之日,八方相信兩個建制派議員會更加high high high。
立會補選新聞,《蘋果》一網睇晒:
http://bit.ly/appledaily1125