韓國男團VIXX噚晚喺亞博館開騷，六子喺台上施盡渾身解數，又唱又跳冧港迷。佢哋換上紅黑色裇衫西褲獻唱《The Closer》，N講笑話：「0依家先係正式開騷，你哋覺得點呀？雖然今次係第一次同大家唱，但你哋都識唱喎，仲好叻，識得跟住我哋唱。」

之後佢哋就輪住講吓今年成員都各自有好多個人活動，Ken透露準備緊音樂劇《花樣男子》，希望可以喺香港演出。

赫就想食得好、唱得好、瞓得好，又賣口乖話自己成日都好掛住香港嘅粉絲，又透露自己準備作曲作詞，並清唱幾句自己寫嘅歌。其他成員都話會分別參演音樂劇同電視劇，又互送高帽，互讚大家樣樣都做得好，簡直係萬能。

Chit Chat完一輪，佢哋再唱《Desperate》及《Bad Bye》。之後VIXX換上全黑西裝獻唱《Milky Way》，期間各自走到台邊同fans揮手，又擺甫士同派心心畀fans影相。

VIXX就喺T台邊同粉絲近距離接觸，介紹返佢哋剛剛唱完、由Ravi同Hyku填詞嘅《Milky Way》，又話呢首歌係為歌迷而唱，之後齊齊用廣東話講：「我愛你哋！」0氹到啲粉絲狂叫。

Leo喺台上話好耐先有機會嚟香港，喺準備嘅時間收到好多粉絲嘅message，又話：「好對唔住我哋咁遲先嚟到香港，今晚可以同各位Starlight（VIXX粉絲稱號）分享呢個舞台好開心，我哋會繼續努力。」又用廣東話講「多謝」，跟住佢哋又再用廣東話講「我愛你哋！」、「Starlight下次再見！」之後唱《Light me up》同《On and On》，全場又跟住唱，氣氛熱烈。

六子入後台後，全場不停用韓文大叫「我愛你」encore。其後，VIXX換上黑Tee，拎住閃燈巨型氣球出場唱《Love Equation》，成員用個巨型波波互碌對方，之後又掟畀粉絲，之後唱出最後一首歌《Heaven》，演唱會正式圓滿結束。
採訪：盧妹