日本組合AKB48人氣成員島崎遙香，因為經常擺出一副好似發緊夢咁嘅態度，所以成日被圍插，早排佢因為哮喘嚴重而休息咗個多月，冇出席握手會等，但係又去咗法國出席影展，被粉絲話佢揀工作。剛剛島崎再參加握手會之後，但噚日佢又話哮喘發作，所以要入醫院休息幾日，但係佢竟然被發現喺前晚同尊尼偶像Johnny'sJr.成員安井謙太郎係Instagram上面密斟。

據指安井用私人IG戶口喺島崎個公開戶口留言，安井撩島崎：「聽日去約會好嗎？」島崎就話：「我聽日要開工呀！」安井再留言：「見個面都好吖。」島崎再表示聽日要做嘢冇時間，但係二人嘅對話俾人截咗圖，島崎發現咗二人私下密斟被發現，佢似乎好驚，立即削除二人對話，仲刪除咗跟隨安井個戶口。但係已經被一班尊尼偶像個粉絲圍插，話佢請病假休息期間原來係去咗媾尊尼仔咁話喎。