是日大年初三（27日）沙田賀歲日賽第二場四班1000米，「眾歡笑」上仗初出配蘇兆輝角逐田草1000米，該役步速甚慢，頭600米34秒32，是今季直路賽最慢段速。

此駒當時能夠交出全場最快末段，從接近包尾位置衝上跑第二，其實難度不低。

今仗出王牌改配雷神壓陣，睇番鄭廐近兩季共有三駒搏失跑第二後，改由雷神接手，取得兩冠一亞，證明此配搭變動乃求補中之部署。

雖然跑直路賽排2檔唔算好，但既然上仗抽3檔走最內叠場地仍追得好，有雷神之助當然更加值得捧場。

第四場三級賽1800米百週年紀念銀瓶，逾半數馬匹於1月8日谷草1800米一月盃出賽。

當中，前四名馬匹「幸福分享」、「協霸神駒」、「聖靈之都」及「馬克羅斯」再碰頭。

睇番該役段速，頭三段時間為13秒99、23秒57及23秒73，全部均慢過當晚三班賽，尾兩段才加快，末段更快至23秒14，形勢對後上馬極不利。

「幸福分享」及「馬克羅斯」放頭賺晒步速形勢，「聖靈之都」則有一步不蝕之利。

反觀「協霸神駒」沿途包尾，彎位走外叠，可交出近22秒半之竄勁克服劣勢入Q，賽績更具說服力，受讓於「時時精綵」20磅，有望後發先至。

尾場三班1200米，一對新勝馬「小太陽」及「聚才」上仗同日不同場贏1200米，締速參考價值大。

「聚才」沿途外叠望空下仍輕勝個多身位，賽績當然出色。

不過計締速卻遠不及「小太陽」，後駒贏馬一役，每段締速均比「聚才」一組為快，而總時間更快超過半秒之多，更難得的是「小太陽」全程按住根本完全無騎過，姿態極度跨張。

「小太陽」今仗雖然抽13檔，但同場快馬唔多，只要埋到二叠順跑，仍然足以再下一城。

撰文：金寶