騎士喺「大帝」勒邦占士（LeBron James）要求增兵下轉會傳聞滿天飛，雖然到目前為止依然係no big deal，但啱啱簽入嘅熱火棄將、前新秀榜眼D威廉士（Derrick Williams）喺周五常規賽作客雷霆一仗即刻派上用場，攞到12分表現唔錯架。不過，雷霆依然韋斯卜克（Russell Westbrook）造出今季第26次「三雙」，主場贏118:109。

騎士賽前放風話「三巨頭」可能會喺四場作客之旅尾站休息，但三人齊齊正選，其中K艾榮（Kyrie Irving）射入全隊最高28分，占士同路夫（Kevin Love）亦分別貢獻18同15分，但韋少單喺第三節已經攻入11分幫雷霆反超前，最終交出29分、12籃板、11助攻，亦以今季第26次「三雙」榮登單季「三雙」排行榜第三位，僅次於67/68球季張伯倫（Wilt Chamberlain）嘅31次同61/62球季「大O」奧斯卡羅拔臣（Oscar Robertson）嘅41次。對於韋少繼續爆seed，名宿兼評述員巴克利（Charles Barkley）就咁形容：「如果你見到佢同隻熊打交，上去幫隻熊啦。」