香港專業教育網每年都會聯同港大民意研究計劃，公佈香港最佳大學排名榜，港大再攞第一名，今年大輸家係中大，雖然穩守第二位，但評分就由去年嘅7.56分下跌至今年7.25分，差啲俾排第三嘅科大追上；中大校長劉遵義仲慘，排名由第三位跌至第四位，而喺中學校長心目中，佢老兄更加只得第五位，科大校長朱經武就蟬聯一哥。
香港專業教育網總編輯時美珍估計，《中大學生報》情色版事件令公眾對中大形象扣分，拖累埋校長民望。
中大唔回應調查結果，至於年年包尾嘅嶺大聲稱有校友想告香港專業教育網喎。其實中大唔使咁失望，噚日大會特別請記者選出同傳媒關係最好嘅大學，中大攞番個安慰獎，攞番個彩。