2010年政改方案，民主黨提出超級區議會方案被接納，中委向黨大會推薦該方案，結果逾七成黨員支持通過政改方案。
5年之後嘅今日，仲有一個月左右又到咗政改表決嘅時間，有民主黨中人近日問過花生友，有冇留意今次政改中，民主黨好似冇乜人提過要開黨大會決定立法會議員投票意向？
其實民主黨中委喺政改方案出爐翌日，已召開特別會議一致通過該黨將全票否決政改方案。花生友聽聞，有黨內溫和派提過想開大會，正式就政改表決意向進行授權，不過中委會好似唔多想。

怕惹本土派狙擊

眾所周知，民主黨內有溫和派支持袋住先，除咗高調搞聯署但搞唔成嘅黃成智外，相信仲有唔少理念同近嘅低調黨友，如果召開黨大會，一旦出嚟嘅結果，支持同反對比率相近，都會令個黨尷尬；至於一眾元老，就以黨內團結為大前提，擔心開黨大會，支持、反對雙方會進一步互相輒亂。
花生友仲八到，一直被認為傾向袋住先嘅部份資深黨員，其實已向黨友分析袋唔過。
資深黨員仲話，撇開個政改方案唔講，上次民主黨支持政改被社民連、人民力量狙擊已經好傷喇，如果今次支持方案，社民連已被行動派視為較溫和，仲有一批傘後組織、本土組織，到時狙擊嘅衝擊力不容小覷。

花生友