迪士尼年尾繼續發力，先有《星球大戰: 最後絕地武士》(Star Wars: The Last Jedi)大賣，喺美國一開畫就以2.2億美元（約17.16億港元），成為周末票房冠軍，而香港截至噚日票房已經有2,269萬元。

除咗星戰，迪士尼彼思嘅動畫《玩轉極樂園》（CoCo）亦唔輸蝕，唔止入圍金球最佳動畫，仲贏咗多個影評人同電影頒獎禮榮獲最佳動畫，大陸票房已突破10億元人民幣。而《玩》片會喺今個月28日香港上映，搵咗許志安同Joey Tang配廣東話版兼唱埋戲入面嘅主題曲。噚日優先場嘅票房已經收成18.3萬蚊。

該片主打父子情、親情，早前請咗一班圈中人去睇試片，當時大會仲拍下佢哋睇片嘅反應。當中有唔少洋蔥位，好似少爺占、吳浩康(阿Deep)同鄭文都眼濕濕。唔少人事後仲喺動畫嘅官網貼相，呼應番片中嘅溫情，好似阿Deep就貼咗同爸爸喺自己演唱會後台嘅合照，佢話希望爸爸能見證自己在音樂上嘅成績。

少爺占就放咗張同囝囝Timmy去旅行嘅相，唔少得當然係有份喺片中聲演曲臣嘅Joey 同囝囝慶祝生日嘅相，不過大頭蝦嘅Joey就唔記得係自己定係囝囝嘅生日。導演郭子健亦貼咗3兄弟妹嘅兒時相片，佢話：「我好多年，未試過喺戲院哭成咁， 一部反雞湯、反正能量，但又很正能量嘅電影，好悲傷、好黑色，但又好溫暖、好幸福嘅電影。」郭子健話好多觀眾喊到完場，都未喊完喎。另外，安仔同Joey仲拍咗條片，呼籲睇咗戲嘅觀眾post相上網，係佳節當前分享同家人、親人嘅愛。

更多娛聞，喺晒《娛果》
http://fb.com/appledailyent